TIRANË – Prej disa ditësh, në qarqe të caktuara të industrisë së muzikës, po përflitet një lajm që, nëse del i vërtetë, do të elektrizonte të gjithë fansat e muzikës rock në Shqipëri.
Zëra të pakonfirmuar flasin për një rikthim të madh: Scorpions – legjendat e rock-ut botëror – mund të mbërrijnë sërish në Tiranë, këtë shtator.
Po, Scorpions, grupi që në vitin 2001 tronditi skenën shqiptare me një nga koncertet më madhështore që vendi ka përjetuar ndonjëherë. Ata që ishin aty e kujtojnë ende si një nga netët më të paharrueshme në historinë kulturore të Shqipërisë – mijëra njerëz që këndonin me një zë “Wind of Change” në një vend që sapo kishte nisur të ndryshonte.
Tani, 24 vite më vonë, a është koha për një rikthim?
Nuk ka ende asnjë njoftim zyrtar. As emra organizatorësh, as posterë, as ftesa. Por burime të ndryshme brenda tregut të muzikës kanë lënë të kuptohet se “diçka e madhe po përgatitet për shtatorin në Tiranë” dhe “nuk është thjesht një koncert i zakonshëm”.
Disa shenja të vogla janë vënë re: një video nostalgjike që po qarkullon në rrjete sociale, referenca të fshehta për “Wind of Change”, dhe mbi të gjitha, një këshillë që po përhapet mes fansave të rock-ut: “mos bëni plane për fundjavën e dytë të shtatorit.”
A do të rikthehen me të vërtetë Scorpions në Tiranë?
Urojmë që po. Sepse nëse ndodh, kjo do të jetë një mbrëmje që s’duhet humbur.
