Pavarësisht kërkesave të shumta nga fansat për një rikthim të serialit legjendar Friends, Jennifer Aniston i ka dhënë fund çdo shprese me një deklaratë plot emocion.
Në një intervistë të fundit, aktorja u shpreh prerë:
“Do të ishte fjalë për fjalë, e pamundur,”
duke iu referuar mungesës së mikut dhe kolegut të saj të dashur, Matthew Perry.
Perry, i njohur për rolin e paharrueshëm të Chandler Bing, ndërroi jetë në tetor të vitit 2023, në moshën 54-vjeçare, si pasojë e mbidozës së ketaminës. Gjatë viteve të fundit, ai kishte folur hapur për betejën e tij me depresionin dhe varësinë.
“Është zemërthyese që iu desh të përballej me kaq shumë demonë,” – tha Aniston.
“Por, për dikë që luftonte kaq shumë nga brenda, ai arriti të na dhuronte kaq shumë të qeshura dhe kjo ishte gjithçka për të.”
Jennifer Aniston dhe Matthew Perry ishin pjesë e kastit origjinal të Friends, bashkë me Lisa Kudrow, Courteney Cox, Matt LeBlanc dhe David Schwimmer. Seriali, që u transmetua për 10 sezone dhe përfundoi në vitin 2004, mbetet një nga prodhimet më të dashura në historinë e televizionit.
“Friends më formësoi si njeri. Ishte një gëzim i pastër. Mezi prisja të shkoja në punë çdo ditë,”
ka treguar Aniston, duke kujtuar ndikimin që seriali pati në jetën e saj personale dhe profesionale.
Aktorja shtoi se sekreti i suksesit të Friends nuk qëndronte vetëm te skenari apo humori, por te lidhja unike që kishte grupi i aktorëve:
“Kishte diçka të rrallë në kiminë tonë, si një shkëndijë magjike e kapur në një shishe. Ishim me fat që ajo u fiksua në kamera.”
Falë platformave streaming, seriali po përjeton një “rilindje” mes brezit të ri, që po e zbulon për herë të parë.
“Shumë njerëz më thonë se shikojnë Friends për t’i ndihmuar me shëndetin mendor,”
ka shtuar Aniston.
“Kur ndihen të stresuar nga bota përreth tyre, thjesht ulen dhe shikojnë një episod. Dhe ky është komplimenti më i mirë që mund të marrim.”
Në vitin 2021, aktorët u ribashkuan për episodin special Friends: The Reunion, një homazh i ndjerë për serinë dhe, për shumëkënd, momenti i fundit që panë Matthew Perry-n në ekran.
