Adi Krasta në ‘News 24’, një program i ri për aktualitetin

Prej vitesh i mungon ekranit dhe sigurisht që rikthimin e tij e presin të gjithë me padurim. Bëhet fjalë për Adi Krastën, moderatori që gjithmonë është cilësuar si një ndër më të aftët në fushën e tij. Këtë herë ai do të rikthehet në ekranin e ‘News 24’ dhe duket se do të vijë me një format krejtësisht të ri, ndryshe nga ç’jemi mësuar ta shohim. Në një intervistë për ‘Panorama Plus’ Krasta ka rrëfyer disa nga detajet e programit të tij më të ri, të quajtur ‘A’. “Programi i ardhshëm do të jetë i folur, pra, nuk do të jetë spektakël siç mund të pritet. Në ‘News 24’ po ndërtohet një studio e re. Në qendër do të jetë fjala dhe aktualiteti”, – ka treguar moderatori. Përveç kësaj, Krasta ka thënë se ka ende në diskutim edhe dy projekte të tjera, njëri prej të cilëve do të ketë në qendër ‘Fake News’ (lajmet e rreme). Më tej ai ka folur edhe për mjedisin mediatik në Shqipëri, duke shprehur hapur zhgënjimin e tij për kulturën e ulët që përcillet në televizione. /revistawho.com