Në studion e “Live From Tirana”, i ftuar ishte Anton Prendi, një nga menaxherët më të njohur të artistëve në vend. Ai ndau detaje jo vetëm për eksperiencën e Erik Lloshit në “Big Brother VIP Albania 5”, por edhe për rrugëtimin e Shpat Kasapit dhe përgatitjet e tij për të qenë pjesë e spektaklit më të ndjekur në vend.
Gjatë intervistës, Prendi foli hapur për marrëdhënien profesionale me Shpatin dhe dëshirën e tij për të hyrë në shtëpinë e BBV, duke zbuluar se gjithçka kishte qenë e menduar dhe e planifikuar me kujdes.
Në pyetjen nëse Shpati e donte realisht këtë eksperiencë, menaxheri u shpreh:
“Kemi qenë bashkë kur Shpati ka firmosur. Shpati donte, edhe unë kam insistuar që të hynte në ‘Big Brother’. Edhe atij iu mbush mendja për të firmosur. Më vjen shumë keq, ka qenë një djalë shumë i mirë. Patëm punuar shumë fort, sidomos vitin e kaluar, bëmë rreth 10 videoklipe dhe ishte përgatitur që të hynte.”
Ai tregoi se gjithçka ishte ndërtuar hap pas hapi, si në aspektin profesional, ashtu edhe në atë personal, duke e parë BBV-në si një mundësi të madhe për Shpatin.
Momenti më i ndjerë i intervistës erdhi kur Prendi kujtoi takimin e fundit me Shpatin dhe Erikun:
“Kemi qenë bashkë ditën e fundit me Erikun dhe Shpatin. Jemi takuar, kemi pirë, kemi bërë muhabet, ishte dhe me një shok tjetër. I qeshur si gjithmonë… Jam pa fjalë, akoma mendoj që nuk është e vërtetë.”
