Një aksident tragjik tronditi vendin disa ditë më parë, ku 4 të rinj humbën jetën pasi dy makina u përplasën në autostradën Tiranë Durrës. 36vjeçari Dashnor Deliallisi ka qenë duke udhëtuar me shpejtësi dhe në sens të kundërt dhe ka përplasur për vdekje tre shoqet e ngushta Gretën, Izabelën dhe Elonën. Kushërira e Greta Sherifit me iniciale N.E., ka kontaktuar redaksinë e “jetaoshqef” duke kërkuar ndihmë nga ndjekësit për telefonat e 23 vjeçares.
Sipas saj, familjarëve u janë dorëzuar disa sende pa vlerë, por jo telefonat. Ata janë të gatshëm të paguajnë në vlerë monetare, vetëm që telefonat t’ju kthehen, pasi aty kanë kujtimet me Gretën. Kushërira iu bën thirrje personave që kanë telefonin që të mendojnë për dhimbjen e familjarëve dhe t’ua kthejnë, pasi janë e vetmja gjë që u ka ngelur nga vajza e tyre. Ndërkohë, e pyetur për dy shoqet e tjera të Gretës, kushërira thotë se familjarët e tyre i kanë marrë sendet personale, duke qenë se vlera e atyre telefonave nuk ishte aq e lartë. “Përshëndetje JOQ! Dua ndihmën tuaj. Nga vendi i aksidentit në 13 tetor në Sukth me viktima tre gocat, janë humbur dy telefonat e Greta Sherfiti, 1 iPhone 6 e një iPhone 7. Ju lutemi postojeni nëse dikush i ka ose di diçka ne si familje jemi te gatshëm t’ju japim në lekë vlerën e telefonave që t’i blejnë të rinj. Telefonat e Gretës i duam pas se aty na ka lenë terë kujtimet e saja. Ju lutemi te na i kthej pas kush i ka. Shume faleminderit ju lutem postojeni. Unë jam kushërira e saj, por u rritëm në një shtëpi, qe motra ime e vogel. Javës tjetër do behet edhe denoncimi në polici se prindërit s’janë akoma në gjendje. Është gjetur vetëm çanta e saj e hapur me cigaret, portofolin me 4 mijë lekë brenda e ca gjëra pa vlerë, por telefonat nuk u gjetën”, thotë kushërira e Gretës. Më tej, ajo bën me dije se po atë ditë pas aksidentit dikush është futur në Facebookun e 23vjeçares rreth orës 15:24 minuta, ndërsa sendet e dy shoqeve të tjera janë dorëzuar tek familjarët. “Po, të afërmit e dy shoqeve të tjera i kanë marrë thanë policët, por ishin telefona me vlerë më të vogël, për një telefon të Gretës e dimë sigurisht që ishte tek çanta e saj e tjetrin në dorë kur ndodhi aksidenti. I kanë marrë ndoshta nga vlera e lekëve pa menduar vlerën e fotove për neve. Kur na dhanë çantën të hapur i thamë se mungojnë telefonat e na thanë nuk u gjendën, shkoni e kërkoni në makinë. Por, çanta po të qe hapur në momentin e aksidentit gjërat që kishte brenda do ishin shpërndarë, policët thanë se çantën e gjetën veç me ato gjëra brenda”, është shprehur për Jetaoshqef.al kushërira e Gretës.
DALIN FOTOT/ POLICET DOREZOJNE SENDET PERSONALE TE VIKTIMAVE
Por “BalkanWeb” ka publikuar fotot e momentit kur policët e Durrësit i dorëzojnë familjarëve të 4 viktimave të aksidentit tragjik në Sukth sendet e tyre personale. Gazetarja Klodiana Haxhiaj ka mundur të sigurojë fotot kur policët mbajnë në duar sendet personale të tre shoqeve të ngushta, të cilat humbën jetën nga përplasja kokë me kokë me mjetin me targë AA 979 GV, me drejtues shtetasin Dashnor Deliallisi. Po sipas të njëjtave burime policët kanë konfirmuar se kanë dorëzuar tek të afërmit çdo gjë që kanë gjetur në makinën me targa AA 694 IL, ku udhëtonin tre vajzat, ndërsa nuk dinë asgjë për fatin e telefonave të humbur, raporton “Balkanweb”.
