Johnny Depp përveçse në gjyq me ish-gruan e kemi njohur si një aktor dhe si muzikant të talentuar të muzikës “rock”. Tani është koha për një talent të ri, pikturën.
Para gjithçkaje, ka qenë piktura dhe vizatimi, si elementë të rëndësishëm të shprehjes dhe krijimit të tij. Përveç krijimtarisë, ai është gjithashtu një koleksionist i çmendur dhe zotëron një koleksion privat që përfshin gjithçka nga Basquiat te Banksy.
Ekspozita e parë e pikturës së Johnny Depp mban titullin “Friends & Heroes” dhe fokusohet te njerëzit që ai i njeh mirë dhe që e kanë frymëzuar atë si personalitet. Çdo imazh është një pasqyrim intim i karakterit të tyre në sytë e Depp. Miku i tij i dashur dhe kitaristi ikonë i Rolling Stones, Keith Richards , e frymëzoi stilin e tij në portretizimin e Jack Sparroë, deri tek Bob Dylan, Al Pacino e Elizabeth Taylor.
Siç u përmend për veprat, Depp ka krijuar një stil të tijin ekspresionist me shumë shtresa.
Arti i Johnny Depp kalon kufirin midis “Pop Art” dhe “Street Art”. Imazhet e njohura të njerëzve të kulturës pop janë ripërpunuar me ngjyra të gjalla, të ndezura dhe të veshura me energjinë dhe magjinë e “Street Art”.
Të gjitha 780 pikturat, me çmim mbi 3,950 paund secila, u shitën brenda pak orësh nga lançimi i tyre, duke shënuar shitje rekord për galerinë. Figura të njohura të paraqitura në koleksionin e Depp përfshijnë Elizabeth Taylor, Keith Richards, Bob Dylan dhe Al Pacino.
“Gjithmonë e kam përdorur artin për të shprehur ndjenjat e mia dhe për të reflektuar mbi ata që kanë më shumë rëndësi për mua, si familja ime, miqtë dhe njerëzit që i admiroj. Pikturat e mia e rrethojnë jetën time, por i mbajta ato për vete dhe e kufizova veten. Askush nuk duhet të kufizojë veten”, ka thënë Depp në fjalën e tij për ekspozitën.
