Të gjithë e kujtojmë filmin “Unë, ti dhe Kasandra” e bujën e madhe që bëri vite më parë kur doli në Shqipëri. Po ashtu i mbajmë mend mirë edhe protagonistët, pasi përveç roleve të mira të filmit që na mbetën gjatë në kujtesë, ata kanë vazhduar ndërkohë karrierën e tyre duke na sjellë të tjera role të suksesshme. Mirëpo teksa i shihnim edhe një herë të gjithë bashkë në skenën e Teatrit Kombëtar, kujtesa na ktheu prapa në kohë. Sivjet me nisjen e sezonit të ri artistik, ka qenë regjisorja Rozi Kostani që e ka mbledhur kastin e aktorëve në shfaqjen “Kujtesa e ujit” premiera e të cilës ishte mbrëmjen e së enjtes. Rajmonda Bulku, Neritan Liçaj, Jonida Vokshi, Violeta Trebicka e Marin Orhanasi sollën në skenë komedinë që u duartrokit nga publiku i teatrit. Shfaqja trajton historinë e tri motrave, që kthehen në shtëpinë e fëmijërisë pas humbjes së të ëmës, që interpretohet nga Rajmonda Bulku. Ajo do të vazhdojë të vihet në skenën e Teatrit Kombëtar në datat 17-18-19 shtator ora 20:00.
