Këngëtari i njohur italian Al Bano është shtruar mbrëmjen e djeshme në spital pas problemeve me shëndetin.
Sipas mediave italiane, 73 vjeçari pas interpretimit përpara publikut, mbrëmjen e së dielës 19 mars, në Porto Sant’Elpidio, rrugës për në shtëpi, ndjeu një dhimbje dhe bashkëpunëtorët e tij e shoqëruan në një poliklinikë në Bari, shkruan “Opinion”
Në muajin dhjetor të vitit që kaloi , përpara Sanremos, këngëtari iu nënshtrua një ndërhyrjeje kirurgjikale pas një ataku kardiak.
Sipas burimeve të spitalit bëhet fjalë për një ishemi kalimtare. Pas shtrimit në Bari, Al Banon e vizitoi edhe shoqja e tij Loredana Lecciso. Gjatë natës ai u dërgua në spitalin e Leçes në repartin e specializuar për kurimin e iktusit.
