Sonte më 4 shkurt, Londra bëhet dëshmitare e një momenti historik për muzikën shqiptare. Alban Skenderaj ngjitet për herë të parë në skenën ikonike Eventim Apollo, duke u bërë artisti i parë shqiptar që performon në këtë tempull botëror të muzikës. Koncerti mban titullin “Motiv” dhe është sold out, një fakt që e vendos këtë mbrëmje në hartën e ngjarjeve ndërkombëtare.
Eventim Apollo nuk është thjesht një sallë koncertesh. Është një skenë që ka formësuar breza dhe ka pritur legjenda si The Beatles, Queen, The Rolling Stones, David Bowie, Pink Floyd, Led Zeppelin, Nirvana, Madonna, Prince, Whitney Houston, Adele, George Michael, Elton John, Coldplay, Bruno Mars, Billie Eilish, Harry Styles dhe Sam Smith.
Sonte, këtij panteoni i shtohet për herë të parë një emër shqiptar, Alban Skënderaj.
“Motiv” nuk është një koncert i izoluar, por kulmi i një udhëtimi që ka kaluar kufijtë e Shqipërisë, duke bashkuar diasporën dhe publikun ndërkombëtar rreth një gjuhe universale, emocionit.
Muzika e Alban Skenderajt, sa intime e poetike, aq dhe e drejtpërdrejtë gjen në Londër një rezonancë të re, duke e kthyer këtë mbrëmje në një dialog mes kulturash.
Në një qytet ku historia muzikore shkruhet çdo natë, Alban Skenderaj nuk është aty për të imituar legjendat, por për të shtuar një kapitull të ri. Një kapitull ku Shqipëria ngjitet në skenë me dinjitet, zë dhe identitet.
