Ndonjëherë mjafton shumë pak për ta bërë dikë të lumtur, qoftë edhe prania e një personi të dashur dhe të pëlqyer. Por kur këtë person e adhuron, prania e tij të duket si realizimi i një ëndrre të bukur. Kjo ka ndodhur edhe me Sidorelën, një vajzë e paralizuar e cila adhuron këngëtarin Alban Skënderaj.
“Çdo këngë e tij, kur e degjoj, më duket se më lexon shpirtin. E nis ditën me këngët e tij. Kur nuk më zë gjumi dëgjoj këngët e tij. Kur jam me dhimbje, dëgjoj këngët e tij. Është një këngëtar, që lum ne që e kemi. Mjafton t’i dëgjoja njëherë zërin, se e kam dëgjuar gjithmonë duke kënduar. Të më merrte Albani mua në telefon? Thjesht do bllokohesha. Nuk do më besohej se do ishte ai. Do doja të ishte dikush pranë meje të më pickonte, të më thoshte, shiko se është vërtet Albani. Kur dëgjoj këngët e tij, humbas. Flasin njerëzit përreth, por unë jam duke kënduar këngët e tij. Është emocion që kush ka një idhull, më kupton. Ai të frymëzon, jep mesazhe shumë në tekstet e tij që shkruan, në muzikën që bën. Është më i miri, është i paarritshëm. E kam shumë qejf”-ka thënë e emocionuar Sidorela në emisionin “Shqiptarët për shqiptarët”, në “News 24”. Ëndrra e saj është bërë realitet sepse Albani ka shkuar në shtëpinë e Sidorelës duke e emocionuar pafund fansen e tij, e cila e kishte shumë të vështirë të qetësohej pasi emocionet ishin shumë të forta. Këngëtari gjithashtu është prekur shumë nga fjalët vajzës dhe nëpërmet një statusi në llogarinë e tij në “Instagram” shkruan: “Dje isha idhulli jot, sot je ti idhulli im, për forcën, kurajon, buzëqeshjen dhe shpirtin tënd të paster”.
