Alban Skënderaj, një nga artistët më të dashur shqiptarë, foli hapur për përvojën e tij të fundit në organizimin e koncertit madhështor në stadiumin “Air Albania”.
Gjatë intervistës në emisionin “Mirëmbrëma yje” me Arbana Osmanin, Albani ndau detaje për sfidat e këtij vendimi dhe rolin vendimtar të bashkëshortes së tij, Miriam Cani.
Pavarësisht dyshimeve të tij fillestare, Albani pranoi se ishte Miriami ajo që e kishte shtyrë për vite të tëra të realizonte këtë hap të madh. Ajo ka qenë mbështetësja më e madhe e tij, duke i dhënë vazhdimisht kurajë për të guxuar.
“Ka katër, pesë, gjashtë vjet që më ka përsëritur këtë dëshirë dhe ka besuar tek unë 10-fishin e besimit tim,” tha Albani, duke kujtuar bisedat e shumta mes tyre, që shpesh përfundonin me debate të lehta, por gjithmonë plot dashuri dhe përkushtim.
Ai e pranoi me humor se vendimin për të mbajtur koncertin në stadium nuk e kishte marrë vetë:
“Vendimin për ta bërë koncertin në stadium e ka marrë Miriami, jo unë. Në fund, ajo kishte të drejtë – interesi dhe dashuria e publikut ishin jashtëzakonisht të mëdha.”
Albani e përshkroi mbështetjen e Miriamit si një shtyllë të fortë në karrierën dhe jetën e tij, duke theksuar se suksesi i këtij koncerti nuk do të kishte qenë i mundur pa përkushtimin dhe këmbënguljen e saj.
