Për Islin televizioni është dashuri e madhe, nga ato për të cilat zemra rreh fort. Pas një periudhe pushimi siç dhe ai vetë e quan, rikthehet në ekran për të vazhduar rrugën që tani shtrohet me talente. Tani çdo të hënë Islin do ta shohim në ekranin e “Vizion Plus” në drejtimin e “Albania’s got talent”. Po-po-po-po!
Intervista nga Manjola Markola
Rikthehesh në ekran pas një pauze, çfarë të bindi që të thoje “Po”?
Rikthehem pas gati dy viteve e gjysmë larg ekranit dhe kam rikuperuar energji të reja. Por mbi të gjitha rikthehem me një dëshirë të madhe për të bërë televizion të mirë duke ardhur me një produksion cilësor, të bukur dhe argëtues siç është patenta e “Got Talent”, që mendoj se është ajo çfarë publiku po kërkon prej kohësh të shohë në televizionet shqiptare.
Si ishte jeta e Islit pas shkëputjes nga ekrani dhe derisa pranoi të drejtojë “Albania’s got talent”?
Kjo periudhë pushimi ishte e domosdoshme për mua, një kohë e kaluar në qetësi duke qenë më shumë pranë familjes sime dhe miqve të mi. Më ka vlejtur gjithashtu kjo shkëputje që të rivendos prioritete të reja për veten, të vlerësoj mundësitë “e humbura”, potencialin që kam brenda vetes, të provoj gjëra të reja dhe të sfidoj veten edhe në fusha të tjera, si p.sh. në sipërmarrje. Mund të them se në aspektin personal dhe emocional ishte ajo që më duhej në atë moment për të rimarrë veten dhe për të ecur përpara me ide të qarta se çfarë dua në jetën time.
Kur nis një projekt të ri, bën me veten tënde një listë me ato “goals” që do të arrish përmes tij? Na zbulo ndonjë para nisjes së “Albania’s got talent”?
Përgjithësisht, jam një njeri që e vlerëson thjeshtësinë dhe kam disa objektiva thelbësore, mes të cilëve qëndron dëshira për të prodhuar televizion të mirë, që vërtet kënaq publikun. Qëllimi kryesor është t’u jap shikuesve diçka që i përmbush dhe i kënaq, duke i ofruar përmbajtje që u flet.
Pra, në këtë listë, qëllimi kryesor është që shikuesi “Albania’s Got Talent” t’i gjejë të gjitha këto dhe ta shijojë vërtet. Për mua, televizioni është një mision që duhet t’i respektojë dhe kënaqë të dyja palët si krijuesit, ashtu edhe shikuesit.
Nisur nga atmosfera e audicioneve, çfarë prisje dhe çfarë zbulove? Të kanë befasuar talentet?
E gjitha ka qenë një surprizë! E prisja që do të kishte talente, veçanërisht të rinj, por jam befasuar si nga numri i madh i konkurrentëve, ashtu edhe nga larmia e moshave që kanë aplikuar. Të mëdhenj e të vegjël, mendoj se do ta shndërrojnë “Albania’s Got Talent” në një spektakël të vërtetë, plot emocion dhe magji.
Si e ke gjetur veten mes 4 anëtarëve të jurisë?
Një juri më të mirë për këtë program nuk mund të kisha kërkuar! Janë katër emra që publiku i do për gjithçka që i kanë dhënë skenës dhe artit ndër vite, dhe mbi të gjitha, për origjinalitetin dhe veçantinë që gjithsecili ka. Adelina, Ledina, Goni dhe Kastro janë artistë të vërtetë dhe për këtë e kanë fituar dashurinë e publikut dhe timin gjithashtu.
1 fjali për ata që mezi po e presin “Albania’s got talent”…
Mezi po e pres dhe unë që çdo të hënë, të takohem me publikun dhe bashkë të përjetojmë emocionet e këtij spektakli që shfaq talentin e jashtëzakonshëm të disa njerëzve të guximshëm, plot pasion dhe me ëndrra të mëdha.
Ky program është një festë e shpirtit krijues, talentit dhe kurajos së shqiptarit të thjeshtë që kapërcen çdo barrierë për të përmbushur ëndrrat ndaj jam i bindur që “Albania’s Got Talent” do të jetë bashkëudhëtim emocionues çdo të hënë në ekranin e Vizion+.
