Në këngën e saj të fundit “Thana”, Tayna ka përfshirë refrenin e njohur të këngës “Vajzat e fshatit tim” , një perlë e repertorit shqiptar që prej dekadash mbetet në kujtesën kolektive. Por ndryshe nga rastet kur elementë të tillë përdoren pa leje, këtë herë gjithçka ka ndodhur me dakordësinë e plotë të autores. Një shembull i rrallë respekti dhe harmonie artistike.
Alida Hisku, në një intervistë televizive, ka treguar se materiali muzikor iu dhurua Taynës me dëshirën që muzika shqiptare të dëgjohej më gjerë, veçanërisht në Kosovë dhe për publikun e ri.
Megjithatë, në një gjest mirënjohjeje, Tayna i ka dërguar 250 euro, një shumë modeste në raport me industrinë e sotme muzikore, por që në këtë rast merr vlerë simbolike. Jo si tarifë, por si shenjë respekti për një zë që ka formësuar një epokë.
“Unë marr qëllimin, nuk marr interesat personale. Qëllimi im ishte që një këngë shqiptare të shkonte edhe tek publiku i Kosovës, pa llogaritur ka apo jo sukses… Ajo më kërkoi numrin e Enver Shëngjergjit dhe Xhuljana Jorganxhi që ka bërë tekstin dhe pas dy javësh kam parë që më ka postuar 250 euro. Unë nuk e shita këngën, ja dhurova. Por ajo ishte një simbol”, ka theksuar këngëtarja Alida Hisku, duke sqaruar se nuk e ka “shitur” këngën, por e ka konsideruar si një akt simbolik.
Ky moment shkon përtej një sample-i muzikor. Është një dialog mes dy kohëve. Një artiste që përfaqëson shpirtin e viteve ’70 dhe një tjetër që mishëron estetikën urbane të 2026-ës. Në vend të përplasjes së brezave, kemi një dorë të zgjatur. Dhe kur një refren i vjetër ringjallet në një beat modern, nuk është thjesht remix por një urë mes brezash.
Historia e Tayna-s dhe Alida Hiskut nuk është thjesht për 250 euro. Është edhe për vlerën e një kënge që jeton dy herë.
