Alketa Vejsiu ka dhënë një lajm të bukur për të gjithë adhuruesit dhe ndjekësit e rregullt të saj dhe mesa duket surpriza do jetë e prekshme në fund të këtij viti. Edicionin e 58-të të Festivalit të RTSH-ës do e drejtojë moderatorja e njohur e cila, e sheh këtë detyrë të re si një sfidë dhe ëndërr të bërë realitet. Lajmin e ka bërë të ditur vetë Vejsiu me anë të një postimi në ‘Instagram’ ku fillimisht falënderon ‘Klan Tv’ që edhe këtë shtator do i japë mundësinë të drejtojë ‘Dance With me’ dhe më tej zbulon surprizën.
“Do kemi një sezon fantastik këtë vit në @rtvklan. Këtu nuk bëhet fjalë vetëm për projektet dhe produksionet që më përfshijnë, por për të gjithë programacionin e @rtvklan. Në 15 shtator me ‘Dance With Me’! Kam pasur mbështetjen e këtij televizioni që 14 vjeç që kur dola për herë të parë në ekran dhe vazhdoj ta kem! Këtë vit do jem në Drejtimin Artistik, Skenarin dhe Drejtimin e Festivalit të Dhjetorit në krahë të Vera Grabocka në RTSH! Ky Festival respekton traditën e muzikës shqiptare dhe hyn në Edicionin e 58-të; unë ngjitem për herë të parë në skenën e tij… Më shumë se sa sfidë është dëshira e madhe për t’i shërbyer këtij Festivali si një shqiptare e devotshme me ndjeshmëri të lartë për artin, kulturën, muzikën, traditën, shpirtin e këtij kombi, gjërat e bukura dhe të mira që mund të bëhen në këtë vend. Ky moment artistik kapërcen konkurrencën mes grupeve të punës që kanë bërë Festivale në Shqipëri(respektoj me të vërtetë historinë e secilit prej tyre) dhe do ulem të duartrokas gjithmonë në sallë për muzikën e bukur, do ta këndoj dhe kërcej pavarësisht i kujt është Festivali! Sepse misioni muzikës është t’i bashkoje njerëzit dhe jo ti ndajë. Përpiqem të jem modeste për gjithçka më pret në këtë aventure të rëndësishme, por s’mund ta mohoj që kam vërtetë dëshirë që të sjellim një frymë të re. Për mua do jetë një takim i rëndësishëm me ju 3 netë në Pallatin e Kongreseve që e kam pritur gjatë. Jeta mesa duket na jep gjithmonë një shans për të realizuar ëndrrat tona dhe unë këtë punë se kam parë kurrë si objektiv për të qenë e famshme, por si një pasion të konsumuar aq bukur për të cilin ja vlen çdo sekondë që kam punuar. Unë në televizion nuk punoj, jetoj! Jetoj çdo moment si një privilegj të jashtëzakonshëm për të komunikuar me ju. Shpresoj që mos t’ju zhgënjejmë! Data e fundit e pranimit të këngëve është 15 Shtator 2019! Publikut dhe vendit tim do t’i jem thellësisht mirënjohëse për gjithçka më ka dhuruar! Faleminderit”, e mbyll Alketa shkrimin dedikuar publikut që e ndjek.
https://www.instagram.com/p/B08Ax-gHhrD/?fbclid=IwAR1ROoR6vF-OoxZYkWKM_JQBL63u1YypFCnO30aAy9uITsIiM4V0J2kU0CI
Siç edhe kuptohet surpriza e parë e këtij viti për festivalin e fundvitit është pjesëmarrja e moderatores. Na duhet të presim edhe disa muaj për të parë nëse do ketë të papritura të tjera. / revistawho.com
