Modelja e njohur Angela Martini ka emocionuar ndjekësit e saj me një postim prekës në Instagram, ku ndan gëzimin për kthimin e bashkëshortit të saj, Dragoș Săvulescu, në shtëpi pas një beteje të gjatë ligjore. Në videon e publikuar, Martini tregon momentin e përzemërt të rikthimit të tij në Los Anxhelos, duke e shoqëruar me një mesazh domethënës:
“Gjashtë vite zjarr. U kthyem në shtëpi me dritë. Lufta ndërtoi historinë dhe dashuria shkroi fundin. Jeta është një film. Pas gjashtë vitesh përpjekjesh, besimi dhe qëndrueshmërie – ia dolëm. Më në fund jemi sërish bashkë në L.A.”
Në postimin e saj, modelja shqiptare nënvizoi se ky rrugëtim ka qenë i mbushur me sfida, por në fund drejtësia triumfoi.
Një betejë ligjore që zgjati gjashtë vite
Bashkëshorti i saj, biznesmeni rumun Dragoș Săvulescu, ka kaluar vite të vështira për shkak të një çështjeje ligjore në Rumani, e cila në fund rezultoi të ishte e padrejtë. Gjykata e Lartë e Drejtësisë në Rumani anuloi urdhrin e arrestit për të, duke konfirmuar se ndjekja e tij ishte abuzive dhe e pabazuar ligjërisht. Italia kishte rrëzuar dënimin e tij prej kohësh, duke i dhënë shtetësi italiane dhe duke e shpallur të pafajshëm, por autoritetet rumune vazhdonin ta përndiqnin padrejtësisht.
Martini, e cila ka qenë një mbështetje e palëkundur për bashkëshortin e saj gjatë gjithë kësaj kohe, theksoi rëndësinë e besimit dhe forcës për të përballuar sfida të tilla:
“Mrekullitë ekzistojnë. Engjëj njerëzorë u shfaqën në momentin dhe vendin e duhur, duke na udhëhequr kur kishim më shumë nevojë. Ishte një betejë e tmerrshme – por ne fituam.”
Pas një periudhe të gjatë përpjekjesh, çifti më në fund ka mundësinë të jetojë i qetë, duke e konsideruar këtë moment si një kapitull të ri në jetën e tyre. Pritja emocionuese dhe fjalët e sinqerta të Angelës kanë prekur ndjekësit e saj, të cilët kanë uruar çiftin për fundin e lumtur të kësaj historie të gjatë dhe të mundimshme.
