Roli si Anika e ka bërë Surbi Çandan një nga aktoret më të preferuara në Indi dhe ishte seriali “Bixhoz me dashurinë” ai që i dha famë të madhe. Teksa seriali vazhdon të transmetohet dhe të blihet nga vende të ndryshme, aq më shumë rritet fama e aktores bukuroshe që ka rrëmbyer vëmendjen e të gjithëve. Në një intervistë së fundmi Surbi ka zbuluar edhe skenën e saj të preferuar në serial dhe është pikërisht skena ku ajo aktron sikur i ka humbur memoria. “Nëse do më duhej të zgjidhja, po zgjedh skenën kur unë humbas memorien. Sigurisht, ai ishte plan i Shivai Sing Oberoit dhe unë duhet të shtiresha sikur e kisha humbur vërtet. Në këtë skenë Anika kuptoi se kishte rënë në dashuri me Shivain. Anika nuk kishte rënë kurrë në dashuri, nuk e kishte ndjerë kurrë atë emocion por ra në dashuri me Shivain. Ajo nuk e shihte dot Shivain në sy dhe kur ai e prekte ajo emocionohej sepse e kuptonte që po binte në dashuri me këtë person. Mendoj se kemi bërë skena shumë të mira. Gjithashtu më kanë pëlqyer edhe skenat me Tian”-është shprehur aktorja.
