Përpara pak kohësh Turjan Hyska, konfirmoi largimin e tij nga televizioni ‘Vizon Plus’. Turi tregoi se kjo lëvizje kishte ardhur për të nisur një rrugëtim të ri në karrierë dhe nga ‘Vizon Plus’ u largua pa hatërmbetje. Pak ditë pas kësaj, edhe ‘Apartamenti 2XL’ konfirmon largimin nga ky televizon. Me anë të një statusi të gjatë në rrjetin social ‘Facebook’, Julian Deda ka treguar çdo gjë dhe se çfarë do të ndodhë me spektaklin e humorit.
“Gati 9 vite punë të rehatshme. Të rehatshme në të gjitha drejtimet. Është pikërisht kjo, fjala që unë zgjodha për të treguar ndjesinë time në raport me drejtuesit dhe stafin e kësaj kompanie. Ne këtë vend, të punosh rehat është gati një luks, që shumë kompani nuk e ofrojnë. Në ‘Vizion Plus’ dhe ‘TRING’ unë e gjeta me shumicë, prandaj kam dëshirë t’i falenderoj shumë përzemërsisht të gjithë, duke filluar nga Turi, e duke vazhduar me drejtuesit Genc Dulakun dhe Rida Dulakun”, – ka shkruar Juli. Më tej ai ka shtuar se dhe ky largim i tij dhe i ‘Apartamentit 2XL’ ishte pa asnjë lloj pengu dhe inati.
“Kështu vjen ky moment, që duhet parë çfarë vjen përpara dhe ajo që vjen është akoma më e rëndësishme se e kaluara. Bashkë me stafin po nisim një rrugëtim të ri në një tjetër televizion. Për mua është një rikthim dhe sigurisht përgjegjësia për të bërë diçka të mirë dhe të suksesshme është e madhe. Me ndihmën dhe përkrahjen e publikut jam i bindur se do ja dalim të vëmë një tullë të re në karrieren tonë dhe sigurisht në pervojën televizive shqiptare. Shfaqja vazhdon, na shkoftë mbarë…!”, – ka mbyllur Juli shkrimin e tij. /revistawho.com
