Mbrëmja e së enjtes në emisionin “Mirëmbrëma Yje”, drejtuar nga Arbana Osmani, solli një moment të veçantë, kur u zbulua se kantautori i njohur Flori Mumajesi kishte krijuar një këngë dashurie për Arbanën dhe bashkëshortin e saj, Eduart Grishajn.
Të ftuarit në studio, këngëtarët Anxhela Peristeri dhe Klajdi Haruni, ndanë me publikun historinë unike të kësaj kënge, duke treguar prapaskenat e krijimit të saj dhe surprizën që e shoqëroi.
Arbana Osmani zbuloi për herë të parë se gjatë dasmës së saj dhe të Edit, Flori kishte kompozuar një këngë ekskluzive për ta:
Arbana: “Në dasmën time dhe të Edit, kanë qenë të ftuar Anxhela dhe Klajdi, dhe Flori na ka bërë një këngë për ne të dy.”
Klajdi: “Atëherë, nëse më lejon, ajo përveçse është një super këngë, ka pasur edhe një histori shumë të bukur dhe të veçantë, sepse një pjesë e saj, për shkak të kohës, ne e kemi regjistruar në një mini studio në Toskana dhe deri çerek ore para se ta performonim, Flori ishte ende duke punuar mbi të.”
Anxhela: “Prandaj u vonove ti?”
Arbana: “Në fakt, Flori na pyeti: ‘Çfarë kënge keni ju të dy?’ Ne i thamë që kemi ‘Kur të jemi bashkë ne të dy’. Kaq i mjaftoi Florit dhe krijoi nga fillimi një nga këngët më të bukura të dashurisë. Nuk e di nëse është vetëm ndjesia ime, por…”
Klajdi: “Flori mori Arbanën dhe e regjistroi, ndërsa unë i thashë Edit: ‘Hajde se do të të regjistrojë Bruni që t’i bësh një surprizë Arbanës.’”
Arbana: “Nuk e di a do ta publikojë Flori ndonjëherë. Ja kam lënë tërësisht atij në dorë vendimin nëse do ta nxjerrë apo jo, por për mua është një nga dhuratat më të bukura.”
Klajdi: “Besoj se do publikohet.”
