Moderatorja e mirënjohur Arbana Osmani ka ndarë disa detaje mbi projektet e saj të ardhshme televizive, pas më shumë se një viti shkëputje nga ekrani. Gjatë një interviste në emisionin ‘Oxygen’, Arbana zbuloi se është duke përgatitur diçka krejtësisht të re, e cila do të përfshijë elemente nga eksperiencat e saj të kaluara.
“Po përpiqem të krijoj diçka që nuk e kam bërë më parë, por që në të njëjtën kohë të ketë nga pak nga gjithçka që kam realizuar deri tani,”** shpjegoi ajo. “Do të ketë elemente nga ‘Big Brother’, pak nga reality show-t, pak nga ‘Dua të të bëj të lumtur’, pak nga ‘1001 Pse’, dhe ndoshta edhe pak muzikë apo festival.”
Arbana ka patur një karrierë të pasur me projekte të ndryshme, dhe ajo ndan se çdo program që ka bërë ka reflektuar pjesë të personalitetit të saj.
“Kam patur fatin të drejtoj programe të ndryshme dhe të gjitha përmbajnë pak nga unë. Jam një person emocional, e bëj gjithçka me shumë pasion dhe përkushtim. Asgjë nuk e bëj kot; dua që gjithmonë të kënaqem në atë që bëj.” shtoi ajo.
E pyetur nëse ky projekt i ri do të jetë një podcast, Arbana e mohoi duke thënë thjesht, “jo.”
Pas përfundimit të sezonit të dytë të Big Brother VIP Albania, moderatorja vendosi të bëjë një pauzë nga televizioni dhe iu përkushtua biznesit, duke hapur një rrjet restorantesh që tashmë operon në disa pika në Shqipëri dhe Kosovë. Me rikthimin e saj në ekran, fansat e saj presin me padurim të shohin se çfarë risie do të sjellë Arbana këtë herë.
