Pak ditë më parë, Gjykata Themelore në Gjilan ka lëshuar një urdhër-arrest dhe letër-rreshtim ndërkombëtar kundër modeles së njohur Arbenita Ismajli, pas dyshimeve se ajo nuk ka zbatuar vendimin e gjykatës që vajza e saj, Nina, të takohej rregullisht me babain, reperin Feron. Për këtë, ajo akuzohet për veprat penale “Mospërfillje e vendimeve gjyqësore” dhe “Marrje apo mbajtje e kundërligjshme e fëmijës”.
Sipas aktakuzës së Prokurorisë së Gjilanit, që është ngritur më 10 korrik 2025, Arbenita që nga shtatori i vitit të kaluar e ka shpërngulur vajzën jashtë Kosovës dhe nuk ka respektuar vendimin e gjykatës për takime dy herë në muaj në Qendrën për Punë Sociale.
Ndërkohë, modelja duket se e ka marrë me ironi situatën. Në një postim në InstaStory, ajo ndau një foto të një buqete me lule shumëngjyrëshe, duke i shoqëruar me mbishkrimin thumbues:
“Si duken dërgesat nga burgu:”
Ky reagim i tërthortë shihet si një përgjigje ndaj gjithë vëmendjes mediatike dhe presionit ligjor. Aktualisht, Arbenita gjendet jashtë Kosovës, duke kaluar kohë në Dubai, ndërsa përballë akuzave dhe urdhër-arrestit ka zgjedhur të reagojë me humor dhe sarkazëm.
