Ardi Asllani ka spikatur gjithmonë me krijimet e tij dhe mbetet ndër stilistët e preferuar shqiptarë. Një pjesë e madhe e artistëve i kanë besuar daljet publike Ardi Asllanit, duke qenë se punët e tij janë gjithmonë shumë të veçanta dhe të trajtuara me kujdes në çdo detaj. Stilisti ka sjellë gjithmonë tendencat më të fundit të modës në Shqipëri dhe madje duket se ai është edhe një hap para trendeve botërore. Në vitin 2014-të Ardi punoi një fustan posaçërisht për Soni Malajn, kur ajo u shpall fituese e edicionit të 11-të të ‘Top Fest’. Fustani i Sonit ishte i përbërë nga tre materialet e tekstilit tyl, velet dhe dantellë, të cilat ishin të kombinuar dhe të vendosur në formën e rripave të dimensioneve të ndryshme. Përpos ngjyrës është dhe teknika e kombinimit të materialeve që e bën fustanin kaq të bukur. Sot ky fustan bën pjesë në propozimet e tendencave të fundit të stilistëve ndërkombëtarë dhe me siguri këtë vit do të shihet kudo edhe në tapetin e kuq të eventeve botërore.
Duhet të ndihemi vërtet me fat që në vendin tonë kemi artistë të tillë si Ardi Asllani, që me punën e tyre na bëjnë të ecim në të njëjtin hap me kulturën dhe modën e vendeve më të zhvilluara. /revistawho.com
