Në fillim të 2019-tës drejtuesi i festivalit “Kënga Magjike”, Ardit Gjebrea, premtoi se edicioni i këtij viti do të vinte me ndryshime në votim. Gjebrea tha se formula e votimeve do të ndryshonte tërësisht, pasi në edicionin e radhës do të merrej parasysh vota e publikut në internet, vota e këngëtarëve dhe vota e jurisë “New Artist”. Këto fjalë nuk mbetën vetëm në kuadrin e premtimeve, sepse ditën e sotme Gjebrea ka treguar se janë bërë realitet. Ai ka publikuar në “Instagram” spotin e “Kënga Magjike”, nëpërmjet të cilit u bëhet thirrje artistëve që duan të marrin pjesë në festival për të dorëzuar produksionet e tyre në datat 2 dhe 3 shtator. Përveç mënyrës së votimit, duket se këtë vit do të ketë ndryshime të shumta në “Kënga Magjike”, por Arditi nuk i ka zbuluar të gjitha. “Këtë vit në “Kënga Magjike” veç artistëve në netët finale do të votojë edhe publiku, këtë vit do të votojë edhe juria e ‘New Artist’, vetë juria këtë vit do të ketë ndryshime, këtë vit…nuk po i tregoj të gjitha, di vetëm që ky edicion do të jetë thjesht ai që do donte publiku dhe artistët! Ndaj kush mendon të jetë pjesë e magjisë 2019, le të fillojë përgatitjet që tani, të tjerat na i lini ne”, ka shkruar moderatori bashkangjitur promos.
https://www.instagram.com/p/ByDmtJhB9PA/
Kujtojmë se në festivalin “Kënga Magjike” ka pasur jo pak debate mes artistëve për shkak të mënyrës së votimit, sepse sipas tyre nuk është plotësisht i drejtë. /revistawho.com
