Moderatorja e njohur Argjira Spanca ka njoftuar largimin e saj nga emisioni “E Diell” dhe nga ekrani i Top Channel pas shtatë viteve angazhimi në media. Lajmin e bëri të ditur përmes një postimi emocional në Instagram, në përfundim të sezonit të fundit të programit të njohur të së dielës.
Në mesazhin e saj, Argjira rrëfeu se nuk e kishte planifikuar ndonjëherë një rrugëtim në televizion, por dashuria për estetikën dhe kreativitetin e shtyu drejt këtij profesioni. Ajo kujtoi me nostalgji fillimet, duke përmendur eksperiencat dhe projektet që e kanë formuar ndër vite.
“Jam krenare për gjithçka që kam arritur, për sukseset e çdo faze, për rritjen dhe për përvojat që më kanë formuar,” shkroi ajo ndër të tjera.
Spanca konfirmoi gjithashtu largimin nga emisioni “E Diell”, duke e cilësuar si familjen e saj të dytë dhe duke falënderuar publikun për dashurinë dhe mbështetjen ndër vite.
Ajo nuk përjashtoi rikthimin në projekte të reja në të ardhmen, duke lënë të hapur një fazë të re në karrierën e saj.
“Shpresoj që shumë shpejt të shihemi sërish, në projekte të reja, ndoshta ndryshe, por gjithmonë me të njëjtën dashuri,” përfundoi moderatorja.
Largimi i Argjira Spancës shënon një tjetër ndryshim të rëndësishëm në formacionin e “E Diell”, ndërsa ndjekësit e saj presin me interes të shohin se cili do të jetë hapi i radhës në karrierën e saj.
