Këngëtarja e famshme Arilena Ara do të rikthehet këtë vit në festivalin “Kënga Magjike”. Këtë herë, ajo vjen në një duet të veçantë me kantautorin Pirro Çako, i cili gjithashtu rikthehet pas një mungese 12-vjeçare.
Kënga e tyre, “Zero Gradë,” është një baladë dashurie që përshkruan një histori ndarjeje, me një dëshirë për rikthim.
Përveç performancës muzikore, dy artistët u përballën me pyetje rreth dashurisë. Moderatori Ardit Gjebrea e pyeti Arilenën:
“Për cilin motiv do shpërnguleshe në Amerikë dhe për cilin motiv do ta refuzoje vajtjen në Amerikë?”
Arilena, e cila nuk është e huaj për tregun muzikor amerikan dhe ka udhëtuar shpesh në SHBA për projekte profesionale, u përgjigj:
“Pa diskutim për projektet që kam lënë atje, për karrierën time.”
Megjithatë, ajo shtoi: “Do shpërngulesha në Amerikë edhe për dashurinë.”
Deklarata e saj ngjalli interes, duke pasur parasysh se gjatë viteve të karrierës, ajo ka qenë shpesh pjesë e mediave rozë për lidhje të supozuara, të cilat nuk janë konfirmuar kurrë.
