Dy emra të njohur për publikun shqiptar, Arjon Muça dhe Bjordi Mezini, vijnë me një projekt të ri që premton emocion, kulturë dhe udhëtime anembanë globit. Pas eksperiencës së përbashkët në “Big Brother 2”, dyshja rikthehet me “Trip Top”, një emision që do të transmetohet në Top Channel dhe në kanalin zyrtar në YouTube.
Arjoni pritet të marrë rolin e moderatorit, ndërsa Bjordi do të kujdeset për regjinë e programit. Ata do të udhëtojnë në vende të ndryshme të botës, duke sjellë për shikuesit eksperienca të veçanta dhe histori kulturore nga destinacione të larmishme.
“Nga Tokio në Kubë, nga Miami në Australi. Çdo episod një shpërthim kulture dhe adrenaline. ‘Trip Top ju’ çon në zemrën e botës aty ku çdo hap është një histori dhe çdo vend një aventurë. ‘Trip Top’, së shpejti në kanalin e Top Channel në Youtube,” thuhet në videon promovuese të emisionit.
Pamjet promovuese tregojnë dyshen duke eksploruar botën dhe duke përjetuar momente të bukura në vende të ndryshme, nga lindja në perëndim. “Trip Top” duket se do të jetë më shumë se një emision udhëtimesh – një udhëtim përmes historive, kulturave dhe emocioneve.
Projekti shënon një bashkëpunim të ri mes Arjonit dhe Bjordit, që u bënë të njohur për publikun si konkurrentë në një reality show, por që tani i bashkon pasioni për rrëfimin vizual dhe aventurën.
