Një jetë mes librave dhe më shumë se 17 vjet si themeluese e njërës prej shtëpive më të njohura botuese në vend, “Dudaj”, Arlinda është i pari personazh në ҫdo panel ku flitet për librat apo ndikimin e tyre në shoqërinë dhe të rinjtë shqiptarë. Ndërsa jashtë librave, kjo është hera e parë që e shihni kështu.
Jetën e saj nuk mund ta kuptosh pa libra, as shtëpinë jo, sepse dekori kryesor është libri. Brenda mureve me tulla dhe dekorit klasik, kudo sytë të shohin aksesorin kryesor – pasionin dhe punën e kahershme të Arlindës.
Por sot, e ftuar në “Rudina”, kishte një profil tjetër, duke zbuluar më shumë për jetën private jashtë profesionit.
E martuar në moshë shumë të re, vetëm 20-vjeҫare, dhe nënë vetëm pak kohë më vonë, Arlinda tregon se sot është një nënë e lumtur. Nëse është penduar për këtë vendim të rëndësishëm të jetës në moshë të re, ajo thotë se, teksa sheh të birin tashmë 19-vjeҫar, nuk ka pse të ketë pengje: “Kur shikoj Patrikun, jam shumë e kënaqur. Lidhja me të është më shumë si shokë sesa nënë e bir…” – tha Arlinda dhe menjëherë pas kësaj, Patriku i dërgon një videomesazh nga Anglia ku vazhdon studimet, për t’i shprehur mirënjohjen për dashurinë e pakursyer…
Por, me këtë rast, Rudina e ngacmon edhe për bashkëshortin, me të cilin publiku nuk e ka parë asnjëherë: “Po bashkëshorti, në privatësi të plotë, apo jo?” – e pyet moderatorja duke marrë menjëherë konfirmimin e Arlindës: “Po, ai nuk ka pasur asnjëherë dëshirë, por edhe është në një fushë tjetër… “ – tha ajo duke dashur ta lërë me kaq “zbulimin”, por pas pyetjes së Rudinës, mësuam edhe se bashkëshorti i Arlindës është ekonomist me profesion dhe i biri, Patriku, studion Ekonomi në Angli, kështu që edhe ai ka zgjedhur të jetë në rrugën e të atit, megjithëse përpiqet të ndjekë këshillat e mamit për librat dhe ushqen po aq sa ajo pasionin për ta./ Class
