Ta quajmë 8 Marsin ditën e grave të forta, të brishta, të ëmbla, të bukura, të famshme, të lira, të qeshura…? Ta quajmë ditën e supergrave apo të gruas që s’do fare të jetë e tillë? 8 Marsi i të gjitha këtyre bashkë apo i asnjërës prej tyre? Ne nuk duam t’i fusim gratë e vajzat tona nëpër kallëpe, heroina qofshin apo të papërsosura. Ne duam vetëm të festojmë për gruan dhe të kemi një simbol të thjeshtë të numrit 8, që u takon të gjithave atyre që na shkëlqejnë në sy, por ne kemi përzgjedhur 8, që këtë vit kanë shkëlqyer në sytë e të gjithëve. 8 për 8 fusha të ndryshme, 8 gra e vajza që do t’i zbulojmë një nga një gjatë ditës së sotme…
Armela Murati njihet prej këtij viti si pilotja e parë shqiptare! Emri i saj hyri në histori, kur zyrtarisht, iu bashkua Bazës Ajrore të Farkës. 25-vjeçarja me origjinë nga Burreli, e ardhur nga një familje ushtarakësh, vendosi që pasionin për lartësinë, ta kthente në një profesion dhe ëndrrës së saj i afrohet gjithmonë e më shumë ditë pas dite.
Megjithëse viti 2022 duket pak i vonë për zhdukjen e ca barrierave gjinore, në fushën e pilotimit, Armela hodhi hapin e parë, e me siguri do e ndjekin shumë vajza të tjera. Për të, konkurrimi në një terren të dominuar historikisht nga burrat ishte vetëm një hezitim momental. Sot Armela rreshtohet përkrah 11 djemve në kursin e pilotimit dhe e sheh veten në të njëjtën lartësi profesionale me ta. Fundja ç’rëndësi ka çfarë profesioni zgjedh. Nëse e do mjaftueshëm diçka dhe punon për të, do e marrësh, si çdo gjë tjetër në jetë.
Armela e di se bashkë me guximin për të sfiduar lartësinë, ka pranuar edhe misionin për t’i shërbyer vendit në kohë të mira e të vështira dhe nga ky rrugëtim as nuk ka ndërmend më të kthehet pas./revistawho.com
