Ish-Miss Albania, aktualisht blogger-e dhe sipërmarrëse në fushën e modës, Armina Mevlani, është bërë pjesë e një projekti ndërkombëtar. Në një status të shpërndarë sot në rrjetin social “Facebook”, Mevlani shprehet shumë entuziaste për këtë. Sipas stilistes Sophia Webster pjesë e këtij projekti janë bërë femra inspiruese, ndër të cilat është zgjedhur edhe Armina jonë. Ky projekt bëhet për ndërgjegjësimin e të gjitha femrave mbi potencialin që ato zotërojnë, ndaj dhe konsiderohet si një ndër më të rëndësishmit në karrierën e stilistes së njohur.
“Të them se jam e lumtur është pak, ndihem shumë e emocionuar që sot do ndaj me ju një projekt që ka nisur një vit më parë me dizenjatoren e njohur të këpucëve dhe çantave Sophia Webster. Ky projekt i mrekullueshëm i dedikohet “femrës” dhe rritjes së ndërgjegjësimit ndaj të drejtave të femrës. Kjo çante ka udhëtuar në të gjithë botën, në dorën e një përfaqësueseje për secilin shtet dhe ndihem e privilegjuar që Shqipëria jonë e mrekullueshme është pjesë e këtij projekti dhe që unë jam përfaqësuesja e mesazhit të shkruar në këtë çante. Sot mijëra femra do ta lexojnë këtë mesazh që une kam zgjedhur dhe shumë mesazhe të tjera nga blogger-e apo personazhe publike të përzgjedhur nga vende te tjera. Ky projekt internacional është ndër më të bukurit tek të cilët kam marrë pjesë”, – ka shkruar Mevlani, e cila ka zgjedhur një mesazh kuptimplotë për ta shkruar në çantën ‘shtegtare’.
“Unë zgjedh këtë mesazh ‘Duajeni veten tuaj’! Mendoj se gjithçka nis duke dashur dhe duke vlerësuar veten tonë dhe vlerat tona, e duke ditur sa specialë jemi. Vetëm nëse dimë të duam dhe vlerësojmë veten, atëherë do të vlerësohemi edhe nga të tjerët. Mendoj se çdo qenie njerëzore është speciale dhe të gjithë duhet ta dimë këtë dhe të besojmë tek vetvetja”, – ka shkruar më tej blogger-ja e cila po hedh hapa të sigurtë në industrinë e modës, duke bërë bashkëpunime më emra të njohur ndërkombëtarisht. Mjafton një vështrim i shpejtë në blog-un e Mevlanit për të kuptuar se ajo tashmë është pjesë e një rrjeti botëror blogger-ësh dhe ne nuk kemi pse ta fshehim, jemi shumë të lumtur për këtë.
