Armina Mevlani rrëfen “Milano Fashion Week”, nga ‘Versace’ tek ‘Cavalli’

Blogger-ja e famshme shqiptare, Armina Mevlani, të cilën këto ditë e kemi parë përmes rrjeteve sociale në sfilatat më të rëndësishme të “Milano Fashion Week”, rrëfen në një komunikim të shkurtër me “revistawho.com”, ditët e saj të ngjeshura në Itali. “Sot do të jem në sfilatën dhe festën e ‘Cavalli’-t, nesër tek ‘Missoni’ dhe ‘MSGM’, pastaj janë në rradhë ‘Dsquared’ dhe firma të tjera”, – pohon Mevlani, e cila dje ka qenë e ftuar në sfilatën e ‘Versace’ dhe ‘Elisabetta Franchi’. Siç pranon vetë, vendi në rradhët e para në disa prej sfilatave, i është rezervuar falë blogg-ut të saj, i cili nga sa shihet po i shkon shumë mirë. Madje vetë Armina tregon se gjatë takimeve në Milano, ka arritur të sigurojë projekte të reja, më të mëdha për të ardhmen, të cilat ajo preferon t’ia lërë kohës. Për të qenë prezente në të gjitha sfilatat bukuroshja Mevlani është ndërruar në makinë, siç e ka treguar edhe në ‘snapchat’-in e saj.