Aktori kuban William Levy është ndalur nga autoritetet në Broward County, Florida, në orët e para të mëngjesit. Sipas burimeve të shumta, ylli 44-vjeçar i telenovelave u arrestua për shkak të një sjelljeje që konsiderohet e papërshtatshme në publik.
Akuzat që rëndojnë mbi të përfshijnë dehje publike, sjellje të çrregullt dhe hyrje në një pronë pa autorizim. Në media është shpërndarë edhe fotografia e arrestimit të aktorit, ku ai shfaqet dukshëm i lodhur dhe jashtë forme.
Telemundo raporton se për momentin ai ndodhet në paraburgim në burgun e Weston, një qytet në shtetin e Floridës.
Në rrjetet sociale, nuk ka pasur ende ndonjë reagim nga ish-partnerja e tij, Elizabeth Gutiérrez, apo fëmijët e tyre.
Ky nuk është incidenti i parë ligjor për Levy-n në vitin e fundit. Në një rast të mëparshëm, policia u thirr në shtëpinë e tij pasi Elizabeth Gutiérrez kishte njoftuar autoritetet se aktori ishte “shumë i dehur” dhe në shoqërinë e një gruaje tjetër.
Edhe pse ajo ngjarje nuk përfundoi me pasoja ligjore, u komentua gjerësisht në mediat rozë dhe shkaktoi reagime të shumta nga fansat.
“Shumë i dehur dhe në shoqërinë e një gruaje tjetër në shtëpinë e tij,” – kishte thënë Gutiérrez në një deklaratë për policinë.
