Gazetari i njohur Andi Vrapi ka sjellë një risi në botën mediatike online, duke prezantuar projektin e tij më të ri, një platformë të dedikuar tërësisht fjalës së shkruar: “The Andidote”. Titullin origjinal, siç tregon vetë ai, ia ka sugjeruar CEO-ja e Top Media-s, Lori Hoxha.
Në një postim në “Instagram”, ai shpjegon se, ndryshe nga tendenca e zakonshme për të nisur podcast-e, këtë herë ka zgjedhur një qasje më tradicionale, por njëkohësisht më intime: një hapësirë ku lexuesit të mund të gjejnë reflektime personale, analiza kritike dhe mendime provokuese mbi tema që përfshijnë artin, kulturën, muzikën, median dhe botën e showbiz-it.
“The Andidote” synon të shërbejë si një dritare e re komunikimi, ku publiku nuk kufizohet vetëm në informim, por ftohet të reflektojë, debatojë dhe të shohë realitetin përmes këndvështrimit të autorit.
Me këtë nismë, Andi çel një kapitull të ri në karrierën e tij, duke krijuar një hapësirë të veçantë për dialog kulturor dhe shoqëror në median online.
