Artistja me origjinë shqiptare, Bebe Rexha pas një “lufte” të gjatë për të arritur majat, ja doli mbanë të renditet ndër këngëtaret më të mira në mbarë botën. Për këtë arsye ‘BBC’ ka vendosur t’i kushtojë një artikull të gjatë, në të cilin tregohet e gjithë jeta e Bebes deri sa arriti të bëhet e njohur.
Në artikull shkruhet se ajo përveçse është një këngëtare e shkëlqyer, është dhe një tekstshkruese shumë e mirë, duke qenë se ka krijuar disa nga hitet më të mira në botë. Mund të përmendim “The Monster” të Rihanna dhe Eminem apo “Me, Myself and I” të G-Eazy. Megjithatë rruga drejt suksesit nuk ka qenë e lehtë, sepse asaj i është dashur për 10 vite me rradhë të trokas në dyer të ndryshme dhe më pas të marrë atë që meriton. Më pas ‘BBC’ shkruan se Bebe është pjesë e pushtimit shqiptar të listave botërore, sepse njëlloj si Rita Ora dhe Dua Lipa është me origjinë shqiptare.
“Ka diçka në ujin e shqiptarëve. Ne jemi të fortë, jemi të ndërtuar si kuajt dhe ne mund të përballojmë çdo gjë”, – thotë Bebe Rexha për shqiptarët. Më tej thuhet se babi i saj Flamuri ka shkuar në Amerikë që në moshën 21 vjeçare dhe ka punuar fort për familjen e tij. Megjithatë në fillim familjarët e saj nuk pëlqenin që ajo të merrej me muzikë. “Muzika shikohej si diçka e keqe. Babai më thoshte: ‘Kjo është karriera e djallit’”, – ka treguar Bebe. /revistawho.com
