Ka lajme që të vijnë si grusht në stomak, edhe kur bëhet fjalë për një botë që e njeh vetëm me zhurmë, ritëm dhe drita skene.
Lil Jon, një nga figurat ikonike të kulturës hip-hop ka konfirmuar vdekjen e djalit të tij 27-vjeçar, Nathan Smith, i njohur me emrin e skenës DJ Young Slade, pasi trupi i tij u gjet në një pellg në Georgia.
Në një deklaratë reperi e përshkroi humbjen me fjalë që nuk kanë nevojë për asnjë filtër:
“Jam jashtëzakonisht zemërthyer për humbjen tragjike të djalit tonë, Nathan Smith. Nëna e tij (Nicole Smith) dhe unë jemi të shkatërruar.”
Më pas, ai u shpreh për Nathan-in me fjalë që e bëjnë edhe më therëse dhimbjen:
“Nathan ishte njeriu më i mirë që mund të takoje ndonjëherë… i kujdesshëm, i menduar, i sjellshëm, i pasionuar dhe zemërgjerë, e donte familjen dhe miqtë e tij deri në fund.”
Nathan u pa për herë të fundit në zonën e Milton, Georgia, pasi thuhet se doli nga banesa e tij në rrethana që policia i quajti “të pazakonta”. Raportohet se ai “doli me vrap nga shtëpia” dhe nuk kishte me vete telefonin, një detaj që e thelloi ankthin e ditëve të kërkimit. Të premten, zhytësit lokalizuan dhe nxorën nga uji një trup në Mayfield Park. Hetuesit thanë se besonin se i përkiste Nathan-it, ndërsa konfirmimi final do të vinte nga institucionet mjeko-ligjore. Megjithatë rasti mbetet i hapur dhe nën hetim aktiv.
Mes dhimbjes, Lil Jon e kujtoi të birin edhe për atë që ishte jashtë çdo sensacioni: “Ishte një djalë jashtëzakonisht i talentuar… producent muzike, artist dhe inxhinier… dhe i diplomuar në NYU.”
Një 27-vjeçar, me potencial, me zë, me ëndrra që tani mbetet vetëm në kujtesën e njerëzve që e deshën. Dhe ndonjëherë, pikërisht aty ku fama bën më shumë zhurmë, humbja vjen më e heshtur.
