Emeli Sande është ndër ato këngëtare që ka arritur të hyjë në zemrat e të gjithëve me këngët e saj. Pavarësisht se sot ajo është një ndër këngëtaret më të dashura, për Emilin rrugëtimi në karrierë nuk ka qenë aspak i lehtë. Në një intervistë për revistën “Happiful” këngëtarja ka rrëfyer se për një kohë të gjatë ka vuajtur nga depresioni dhe ankthi, gjë që e ka bërë të dyshojë nëse duhej të vazhdonte punën e saj në industrinë e muzikës.
“Unë dyshoja nëse duhej të vazhdoja të isha muzikante. Pyesja veten nëse njerëzit donin të më dëgjonin mua, sepse ata thoshin se unë dilja shumë në televizor. Njerëzit thoshin se unë isha shumë e ekspozuar dhe më pas unë mendoja: ‘Ndoshta nuk kam vend në muzikë dhe nëse njerëzit nuk duan të më dëgjojnë çfarë duhet të bëj unë?’. Ndodhën shumë gjëra njëherësh dhe unë fillova të humbja besimin tek vetja”, ka rrëfyer artistja e njohur. Emeli pranoi se në atë kohë nuk e kuptonte se kishte rënë në depresion, sepse mendonte se thjesht ishte e lodhur dhe e stresuar, por tani e di shumë mirë sa e vështirë ka qenë ajo periudhë për të. Ajo ka treguar se nuk ka bërë asnjëherë terapi dhe për shkak të kësaj nuk mundi të shërohej në kohën e duhur. Sande ka rrëfyer se albumi i saj “Long Live Angels” ka qenë një lloj shërimi për zemrën e saj të thyer për ndarjen nga bashkëshorti 1 vit pas martesës.
Gjithashtu ajo ka treguar se për një kohë ka vuajtur edhe nga ankthi, por tashmë ka mësuar si ta qetësojë trurin që gjithçka të shkojë mirë. Kujtojmë se rreth 2 vite më parë Emeli Sande erdhi për një vizitë në Tiranë si e ftuar speciale në koncertin që u mbajt me rastin e festës për “Natën e Bardhë”. /revistawho.com
