Motra e Mateos, Keisi, foli sot në “Shqipëria Live” për rrugëtimin e vëllait të saj në “Big Brother VIP” dhe raportin e tij me Brikenën.
Ajo tregoi se Mateo i kishte përmendur Brikenën vetëm në momentin kur ajo u bë pjesë e shtëpisë së BBV, duke i thënë se e njihte. Sipas Keisit, mund të jenë rizgjuar disa emocione te Mateo, por shtoi se edhe nga ana e Brikenës duket se ka diçka, pasi ajo nuk arrin ta shmangë plotësisht.
“Unë kam pak stres sepse po menaxhoj çdo gjë të tij jashtë, por familja po e përjeton shumë mirë. Nuk na ka habitur aspak, sepse është brenda pritshmërive tona. Ai është kështu edhe jashtë. Ka patur një dëshirë shumë të madhe për të hyrë në Big Brother, ishte një ëndërr dhe një sfidë personale për të. Ne i kemi thënë vetëm të jetë vetvetja, t’i marrë gjërat lehtë dhe të mos i marrë personale komentet e banorëve apo të publikut. Ai u ka kërkuar prindërve të mos lexojnë komentet, ndërsa mua të mos bëhem xheloze,” u shpreh ajo.
Keisi theksoi se nuk e dinte më parë që Mateo e njihte Brikenën.
“Kur pa që Brikena ishte pjesë e lojës, ai njoftoi produksionin se e njihte. Unë e mora vesh vetëm atëherë. Më tregoi se kishin patur një njohje, një lloj marrëdhënieje, por nuk më dha detaje për nivelin e raportit të tyre. Ai nuk donte që kjo çështje të bëhej kaq e madhe, por aty brenda çdo gjë del në pah,” tha ajo.
Sipas saj, Brikena përpiqet ta shmangë Mateon, por njëkohësisht nuk arrin ta bëjë këtë plotësisht.
“I qesh fytyra sa herë e sheh. Mateos mund t’i jetë rizgjuar një tërheqje e vjetër, por nuk do ta quaja ndjenjë. Mu duk i padrejtë fakti që Brikena e çoi në nominim, sidomos duke qenë se nominimi ishte për ‘zarf të zi’. Natyrisht, ajo ka lojën dhe strategjinë e saj, por për mua ishte e padrejtë. Nuk e kam parë Mateon të rrezikuar në asnjë moment. Për mua, ai bëri gjënë më të mirë që e shpëtoi Brikenën, duke treguar karakterin e tij,” përfundoi Keisi.
