Historia fatkeqe e 20-vjeçarit Klajdi Spahiu, i cili po përballet i vetëm me sëmundjen e tij në Mynih, ka prekur zemrën e një artisteje të madhe të skenës, siç është Aurela Gaçe. Përmes një publikimi në “FB”, Gaçe ka dhënë shembullin e saj duke i ftuar të gjithë shqiptarët ta ndihmojnë këtë familje. “Nuk bëj kurrë publike nëse mund të ndihmoj dikë (kur mund t’ia dal vetë, e mbaj për vete) por ka raste si e Klajdit 20-vjeçar që po lufton për jetën. E di, secili nga ne ka betejat e veta, por beteja për jetën nuk ka çmim. E fatkeqësisht, spitalet kanë një çmim që të merr frymën. U bëj thirrje kushdo që e ka pak mundësinë, të mendojë si prind që fëmijës po i merret fryma. Unë sapo e dhashe kontributin tim. Uroj me shpirt që ky djalë të kthehet në familje i shëruar plotësisht. Të gjitha dokumentacionet, janë me fakte (familja i ka bërë të gjitha publike për të qenë sa më të besueshëm në hallin e pashoq)”, – shkruan Gaçe në rrjetin social “Facebook”.
