Aurela Gaçe ishte e ftuar special pasditen e sotme në emisionin “Rudina”. Këngëtarja e njohur foli për koncertin recital të mbajtur pak ditë më parë dhe ndau me teleshikuesit detaje nga puna e saj ndër vite. Si rrallëherë Aurela vendosi të fliste edhe për bashkëshortin e saj, Skerdin, me të cilin sot ka krijuar një familje të lumtur. Këngëtarja tregoi se Skerdin ja ka prezantuar miku i saj i ndjerë, Dr.Flori. Më pas Aurela rrëfeu se si ka qenë takimi i saj i parë me partnerin.
“Kur jemi ulur për herë të parë në tavolinë i thashë po bëj një këngë me titull ‘Cash’, që e kam për ato vajzat që duan djemtë me numër me 20. Ai më pa dhe më tha shumë serioz: ‘Po pse po e bën këtë këngë? Kush është qëllimi?’. Unë mendova me vete ky do jetë nga ata që jep lek dhe i djeg. Pastaj i thashë me seriozitet: ‘Se vajzat që punojnë vetë ndihen keq, se mendojnë se kështu arrihen gjërat në jetë’. Më pas ai më tha: ‘Qetësohu se nuk të thashë gjë’. Më vonë nga takimet e shumta për punën e kuptova që nuk i shpëtoja dot”, ka treguar Aurela. Ajo ka shtuar se falenderon Zotin çdo ditë që e bëri Skerdin pjesë të jetës së saj, sepse ai e bën shumë të lumtur.
Përveç kësaj Aurela ka treguar se bashkëshorti e ndihmon shumë me punën, sepse më parë i duhej të merrej vetë me gjithçka, ndërsa sot mendon vetëm për performancën në skenë, sepse për çdo gjë tjetër kujdeset Skerdi. Këngëtarja e njohur ka 6 vite e martuar me partnerin e saj dhe sot ata janë prindër të dy vajzave, Abigail dhe Grace. /revistawho.com
