“Jam 49 vjeç, por ende dukem sikur jam 25! Rrudhat janë zhdukur plotësisht me këtë mjet të thjeshtë shtëpiak. Mjafton ta aplikoni në fytyrë dhe…”.
Ky është teksti i një reklame që po bën xhiron në rrjet, ku personazhi në fjalë e cila duket se po reklamon produktin është pikërisht këngëtarja e famshme Aurela Gaçe.
Deri këtu nuk duket se ka diçka që nuk shkon, deri kur kuptojmë se këngëtarja nuk e ka dhënë kurrë një deklaratë të tillë e as ka reklamuar ndonjë produkt të ngjashëm në rrjetet e saj sociale.
Ajo që ka ndodhur është pikërisht vjedhja e imazhit të këngëtares së dashur për t’u përdorur në një publicitet të rremë produkti.
Këtë e mësuam kur me anë të një reagimi në rrjete sociale, Aurela Gaçe shpjegon gjithçka duke bërë thirrje se kushdo që është përgjegjës, do të përballet me gjykatën.
Ja deklarata e saj e plotë:
“Sapo më dërguan një link me këtë intervistë të sajuar, ku me demek tregoja sekretet e rinisë sime.
E me demek na qenkërka ky krem (që e kanë vendosur në dorën time). Kujtdo që mund t’i dalë kjo reklamë, ju lutem më dërgoni linqet.
Kushdo që ka përdorur figurën time për të reklamuar produket e veta, do të përballet me gjykatën.
(Nëse do të reklamoja diçka, do të ishte në faqen time). Siç e keni parë, në këtë faqe nuk reklamoj asnjë lloj kremi!”, shprehet këngëtarja.
