Sot i ftuar në “Pasdite në Top Channel”, ishte babai i artistit të ndjerë Ergi Dini. Ai tregoi për herë të parë në një studio televizive dhimbjen e madhe. Dashamir Dini i tha moderatores Jonida Shehu se ka vendosur që vdekjen e Ergit ta kthejë në një kauzë. Babai i këngëtarit që u nda tragjikisht nga jeta në muajin nëntor, u përlot dhe rrëfeu se Ergi nuk i donte motorrat. “Vetëm tre javë përpara vdekjes më tha se do i kishte futur në burg të gjithë krijuesit e motorrave. Janë mjeti më i pasigurtë që ekziston”, u shpreh ai. Gazetari dhe poeti shkodran tregoi gjithashtu se Ergi jetonte në Tiranë me motrën e tij Barbana, pasi donte të ishte pranë saj. Ai kishte shkruar një këngë me temë lamtumirën për të motrën, pak ditë para se të ikte përgjithmonë. “Ai ka lënë tri këngë, ku Ergi ka hedhur zërin e që ne do t’i çojmë deri në fund”, tha ai. Më tej z. Dini prezantoi kauzën “Ergi Dini kundër aksidenteve automobilistike”, për të sensibilizuar të gjithë njerëzit. “Nuk dua që të shkojë kot ikja e djalit. Dua ta kthej në kauzë. Në rrugë ka rrezik por nese ecën brenda normave jo. Vetëm nëse ecën shpejt e gjen vdekjen. Njeriu është i rrezikuar kur nuk vendos kaskën, rripin e sigurimit, flet në celular. Më vjen keq që nuk pata mundësi ta ndihmoj djalin tim. Një talent që kishte plot ëndrra e synonte të arrinte diku. Unë jam pjesë e dhimbjes dhe mesazhin do e përcjell. Ecni me kujdes, ruajeni jetën! Vdekja është kudo, aty ku s’e llogarit. Ne që kemi humbur fëmijë, ne pijmë lot. Në këtë lëvizje s’kam interesa financiarë. Lëvizja ime quhet “Ergi Dini kundër aksidenteve automobilistike”. Do ta kemi orientimin drej sensibilizimit tek rinia në shkolla por edhe tek prindërit”, tha ndër të tjera ai. Në studio u bë edhe një lidhje direkte me Ministrin e Punëve të Brendshme Saimir Tahiri, i cili tha se e mbështeste fuqishëm kauzën. “E falenderoj pa masë për iniciativën. është hera e parë që një prind, humbjen e fëmijës në aksident e kthen në kauzë në televizion. Në Shqipëri vdesin 300 njerëz në vit nga aksidentet. Rrugët tona ruajnë një pasiguri të theksuar. Ne do të jemi mbështetje e kësaj kauze”, deklaroi Tahiri./ revistawho.com
