Babë e bijë në një duet, vajza japoneze e artistit shqiptar vjen bashkë me të nga Parisi për ‘Festivalin e Këngës’

Kur u zbulua lista e konkurentëve të ‘Festivalit të Këngës’, u vu re se në të përfshiheshin edhe Genc Tukiçi me vajzën e tij, Nadia. Për Gencin nuk është hera e parë që ngjitet në skenën e këtij festivali, por Nadia nuk i ka provuar më herët emocionet e tij. Sipas “RTSH.al” babë e bijë do të vijnë me një duet me titullin “Ju flet Tirana”, që me siguri do të shndërrohet në himnin modern të kryeqytetit shqiptar. Pjesëmarrja e Nadias në këtë festival është mjaft e veçantë, sepse është hera e parë që një vajzë e re, që gjysmën e origjinës e ka nga Japonia, vjen në këtë kompeticion. Nadia është vetëm 17 vjeçe dhe pasionin për muzikën e ka trashëguar nga babai i saj, ndërsa tiparet fizike nga e ëma që është nga Japonia. Ajo është fare e re në moshë, por duket se e kupton fare mirë peshën e ‘Festivalit të Këngës’, ndaj ka vendosur të niset nga Parisi, vend në të cilin jeton me prindërit, për t’u ngjitur në skenën e tij. Tashmë të gjithë jemi kuriozë të zbulojmë pak më tepër nga ky duet mes Nadia dhe Genc Tukiçit, që duhet të jetë një nga më të veçantët të këtij viti. /revistawho.com