Ylli Puerto Rica-n i muzikës Bad Bunny hyn në historinë e çmimeve Grammy.
Në një nga momentet më domethënëse të muzikës globale, Bad Bunny u bë artisti i parë latin që fiton çmimin Albumi i Vitit, duke thyer një “barrierë” 68-vjeçare dhe duke ndryshuar hierarkinë kulturore të industrisë. Albumi fitues, Debí Tirar Más Fotos, shënon gjithashtu një tjetër precedent: është albumi i parë në gjuhën spanjolle që ngjitet në majën absolute të Grammy-ve.
Artisti triumfoi përballë një liste ikonash të industrisë, përfshirë Justin Bieber, Lady Gaga dhe Kendrick Lamar në të njëjtën kategorinë kryesore. Ai gjithashtu mori çmime të tjera gjatë natës, duke përfshirë “Best Música Urbana Album” dhe “Best Global Music Performance”.
Fitorja e tij nuk ishte thjesht artistike. Në skenë, Bad Bunny foli në spanjisht, me një fjalim të ngarkuar emocionalisht për humbjen, dhimbjen personale dhe rrugëtimin e emigrantëve, duke e kthyer momentin në një deklaratë identitare.
“Para se të falënderoj Zotin, do të them: ICE jashtë. Ne nuk jemi të egër, nuk jemi kafshë, nuk jemi alienë…ne jemi njerëz dhe jemi amerikanë.” shtoi ai gjatë fjalimit të tij.
Në një natë ku muzika u përzie me politikën dhe realitetin social, ai u shfaq i prekur, i vetëdijshëm për peshën historike të asaj që po ndodhte. Ky triumf nuk i përket vetëm një emri, por një kulture të tërë që për vite u mbajt në periferi. Me këtë Grammy, Bad Bunny nuk fitoi vetëm një çmim, ai ripozicionoi muzikën latine në qendër të botës.
