Nga Olti Curri
Ballist Morina duhet të kërkojë një rrugë tjetër për protagonizëm, madje nisur nga një dokumentar i Shakohoxhës ku kërkonte mbështetje ekonomike, personalisht do ta ftoja: Ballist, shko puno. Gjithmonë sipas mendimit tim, dua të them se me veprimin e tij ai vuri një herë në rrezik jetët e futbollistëve shqiptarë dhe shqiptarëve të tjerë që ishin në Beograd në ndeshjen e dronit të famshëm. Askush nuk mund ta parashikonte reagimin e serbëve pas atij veprimi, askush. Në ato momente fusha mund të ishte pergjakur, por fatmirësisht nuk ndodhi.
Ndeshja duhet të ketë protagonistë lojtarët, futbollin dhe himnin shqiptar që bota ta shohë që ne jemi njerëz dhe gjithë fantazitë shoviniste që jemi shpellarë, janë mashtrime. Ndaj, nuk ka vend edhe për lajme bombë nga Ballist Morina.
Me gjithë respektin për këtë njeri, mendoj se nuk mund të bëhet emblemë më shumë se shqiponja në flamur. Nuk dyshoj që do më hidhen në fyt ata që përdorin patriotizmin si mburojë për mosrespektimim e detyrave si shqiptarë, por nuk i ndihmoj dot.
Patriotizmim ta tregojmë duke mbajtur pastër tokën shqiptare, pa ndërtuar e betonizuar çdo centimetër, pa ndotur ajrin, pa u vrarë shqiptar me shqiptar për një fjalë goje.
