Nëse do të na paraqiteshin vetëm fotot e tyre dhe të na pyesnin: “gjeni të përbashkëtën”, e sigurtë është që nuk do ia dilnim dot në pesë orët e para! Mirëpo, Konferenca Rinore organizuar nga Ministria e Arsimit dhe Shërbimi Kombëtar për Rininë ka mbledhur në të njëjtën sallë personazhe nga bota e medias dhe artit, për të treguar historitë e tyre personale të kthimit në Shqipëri. Dikush si refugjat e dikush tjetër vetëm për të kaluar vitet e shkollës, dikush me nota të larta optimizmi e dikush tjetër pak më racional sollën në vëmendjen e audiencës gjithë peripecitë e kaluara, derisa sot kanë një status që çdo i ri/e re ëndërron. Arbër Çepani u kthye për ta pushtuar botën me raki e dashni , ndërsa Marsela Cibukaj prej një oferte të mirë pune nga ‘Top Channel’. Zv.Ministrja e Arsimit, Besa Shahini është e bindur që puna e saj ka më tepër vlerë në kombin shqiptar sesa gjetkë, ndërsa shefi i kuzhinës, Ismet Shehu erdhi për të qëndruar pranë familjes, në vendin e tij, ku krahët i ka të ngrohtë dhe të hapur. Të gjithë e njohim restorantin ‘Ceren Ismet Shehu’, ndaj zgjedhja i ka rezultuar mëse e drejtë. Evi Reçi braktisi Italinë për projekte të rëndësishme në atdhe, ndërsa Endri Shabani vazhdon jetën midis Tiranës dhe Oksfordit, me qëllimin e qartë për t’u rikthyer përfundimisht, me gjithë të mirat e të këqijat e Shqipërisë së vet. Shembulli tjetër ishte Erlind Sulo, i rikthyer nga Amerika dhe tashmë po jep kontributin në çështjet diplomatikë në Kuvendin e Shqipërisë. Përmendim gjithashtu Rona Nushin nga Peja, një farmaciste në profesion, e sot sipërmarrëse e produkteve kozmetike, të cilat i prodhon në Itali, dhe i shet në gjithë Europën, duke patur bazën në Shqipëri! Arnisa Tepelija pas shumë eksperiencash në Europë, është rikthyer për të luftuar korrupsionin dhe jep kontributin e saj në Ministrinë e Drejtësisë. Duke shpresuar që mesazhi është përcjellë qartë, ne kemi shkëputur një frazë për ju : “Duhet t’i japim një mundësi vetes sonë në këtë vend dhe këtij vendi me ne!”
