Pjesëmarrja e Erik Lloshit në “Big Brother VIP Albania 5” po shoqërohet jo vetëm me vëmendje mediatike, por edhe me tensione serioze në jetën e tij personale. Sipas deklaratave të menaxherit Anton Prendi, vendimi i këngëtarit ka hapur një kapitull të vështirë në marrëdhënien me bashkëshorten e tij, Rominën.
Në një dalje publike, Prendi sqaroi se rezerva e Rominës ndaj këtij formati ka qenë e hershme dhe e palëkundur.
“Të njëjtën gjë dhe Romina ka thënë që nuk do e pranonte. Nuk ka qenë vetëm tani kundër. Nuk është se është kundër formatit të BBV, por privatësinë e familjes e ka shumë të shenjtë,” u shpreh ai, duke treguar se familja ka qenë gjithmonë pika më delikate në këtë vendim.
Situata duket se është përkeqësuar edhe më shumë ditët e fundit. Menaxheri pranoi se kontakti me Rominën është ndërprerë dhe çdo përpjekje për komunikim ka dështuar.
“Kam provuar të komunikoj këto ditë, por nuk kam mundur. Shpresoj që t’i ketë parë videot që unë postoj në ‘Instagram’-in e Erikut. Ka thënë që do kishte pranuar çdo gjë, vetëm BBV jo,” deklaroi Prendi, duke lënë të kuptohet se distanca e saj nga gjithë kjo situatë mbetet e fortë.
Ai zbuloi gjithashtu se bindja e Erik Lloshit për të hyrë në BBV ka qenë një proces i gjatë, që ka zgjatur më shumë se dy vite, por gjithmonë me një pengesë kryesore: qëndrimin e partneres së tij. Kjo histori nxjerr në pah anën më pak të dukshme të famës, atë ku vendimet profesionale mund të vënë në provë edhe marrëdhëniet më personale.
