Familjarët e Valon Behramit, Granit Xhakës e Shaqirit flasin për mundësinë e ardhjes së tyre në përfaqësuesen e Kosovës.
Valon Behrami, Granit Xhaka e Xherdan Shaqirit ende nuk kanë vendosur nëse do t’i bashkohen Kosovës. Këtë e kanë konfirmuar familjarët e lojtarëve. Madje, disa nga familjaret e yjeve të Zvicrës kanë kërkuar edhe garanci nëse është i lejuar ndërrimi i Kombëtares.
Ragip Behrami, babai i Valonit, ka konfirmuar se është kontaktuar nga krerët e FFK-së, në lidhje me vendimin e mesfushorit të Watfordit dhe Zvicrës.
“Dua të them të vërtetën se ende nuk ka asgjë. Është një vendim i vështirë. Nuk di asgjë se çfarë do të bëhet. Me Valonin nuk është takuar askush. Takimi ka qenë vetëm me mua, por asgjë nuk është vendosur. Valoni aktualisht është lojtar i Zvicrës. Tani për tani nuk ka asgjë”, ka thënë Ragip Behrami për Koha Ditore.
Ndërkohë, kontaktin me familjen Xhaka e ka konfirmuar për gazetën një i afërm i familjes.
“Duhet që së pari Kosova të marrë një përgjigje definitve nga FIFA nëse me të vërtetë mund të ndërrojnë mjedis”, ka theksuar ai.
Një burim tjetër i afërt me familjen Shaqiri shprehet se po ashtu duan qartësi se a janë në FFK të sigurt se FIFA lejon ndërrimin e Përfaqësueses.
Kurse, vendimin nuk e ka marrë as Valon Berisha i Norvegjisë dhe Salzburgut. “Ende nuk ka asgjë, do të lajmëroj”, ka theksuar ai.
