Të gjithë kemi menduar në një moment nëse gjumi i drekës dhe i pasdites është i dëmshëm apo i dobishëm për shëndetin tonë. Zakonisht gjumi i kësaj kohe lidhet me dembelizmin dhe mërzitjen, por shkenca thotë se kjo nuk është e vërtetë.
Profesori i psikologjisë në Universitetin e Pensilvanisë, Phlip Gehrman thotë se gjumi i pasdites u ndihmon që të hiqni qafe përgjumjen e ditës dhe ndikon në gjithë performancën dhe kreativitetin tuaj. Gjithashtu studimi ka zbuluar se gjumi i pasdites ndikon shumë në rritjen e imunitetit dhe ul shanset për t’u prekur nga sëmundjet kardiovaskulare. Megjithatë që të arrini të gjitha këto duhet të flini me një orar të caktuar. Për të hequr qafe përgjumjen mjaftojnë 15-30 minuta gjumë pasdite. Por nëse ndiheni të bllokuar mentalisht mund të flini deri në 90 minuta, por jo më shumë. Mjaftojnë 90 minuta për të kaluar në të gjitha fazat e gjumit. Nëse zgjoheni në mes të këtij cikli do të ndiheni më të lodhur dhe si të dehur. Për këtë arsye në shumë raste ndiheni më të këputur pas gjumit të pasdites apo dhe me dhimbje koke. Megjithatë jo të gjithë e ndiejnë nevojën e gjumit pasdite, prandaj nëse nuk ju flihet mos u shtrini. /revistawho.com
