Një seri videosh që po qarkullojnë në TikTok kanë ndezur rrjetin: në to, boksieri dhe ylli i rrjeteve sociale Jake Paul shihet duke bërë tatuazh shqiponjën dykrenare, duke folur shqip dhe duke pozuar krenar përpara flamurit kuqezi. Pamjet janë aq bindëse, sa shumë përdorues nisën të pyesin veten nëse sportisti është bërë “shqiptar nderi”.
Por e vërteta është shumë më ndryshe.
Këto video nuk janë xhiruar nga vetë Jake Paul, por janë produkte të inteligjencës artificiale, të krijuara me detaje aq të sakta sa kanë mashtruar miliona ndjekës. Në to, “Jake” shfaqet në situata që variojnë nga komike në krejt absurde — duke falur namaz në xhami, duke bërë rutinën e makeup-it apo duke deklaruar se është gay.
Reagimi i boksierit erdhi pas disa ditësh heshtjeje dhe ishte po aq viral sa videot vetë. Në një klip të postuar në TikTok dhe Instagram, ai ironizon gjithë situatën duke bërë vetë makeup-in përpara kamerës dhe më pas ndalet për të thënë me ton serioz:
“Kjo po del jashtë kontrollit. Këto video janë të rreme dhe ata që i krijojnë do përballen me pasoja ligjore.”
Megjithëse Jake e ka bërë të qartë se tatuazhi me shqiponjën nuk ekziston, rrjeti nuk ndalet së fantazuari. Në komente, shqiptarët shkruajnë me humor: “Lëre tatuazhin, ta presim me byrek në Rinas!” — ndërsa të tjerë pyesin nëse ndoshta, pas gjithë këtij “deepfake”-u, Jake Paul do të mendojë seriozisht për një vizitë në Shqipëri.
