Ekipet e shpëtimit kanë pasur një rol kyç në nxjerrjen e trupave nga rrënojat e banesave në Durrës e Thumanë. Të gjithë ju kanë shprehur mirënjohjet për punën që kanë bërë dhe Bes Kallaku ju ka bërë një dedikim special. Aktori i humorit ka publikuar në ‘Instagram’ disa foto nga Bubqi me ushtarët që ndihmuan në operacionet e kërkim-shpëtimit. Besi ka thënë se ata janë shpëtimtarët e vërtetë që nuk kanë nevojë as për reklamë në rrjete sociale. “Sot në Bubq me një pjesë të heronjve, ekipet e shpëtimit, zjarrëfikset, ushtarët, dhe pikërisht ata heronjë që nuk dalin në asnjë profil VIP-i apo politikani. Këto nuk kanë nevojë as për like as për komente. Këta janë shpëtimtarët e vërtetë ata që nxorrën të gjallët nga rrënojat. Ata që derdhin të parët lotët e dëshpërimit, sepse syri i tyre shikon i pari babain, nënën, djalin, vajzën apo burrin me gruan të përqafuar nën rrënoja. Këta që harrohen menjëherë deri në fatkeqësinë e radhës. Edhe unë, edhe ti, të gjithë ne, as ne nuk na vret as fija e ndërgjegjes nesër pas kësaj dhimbje. Por këta do t’i vrasi gjatë, si iu vranë duart ashtu dhe shpirti. Këta që me rrogat e tyre mezi mbyllin muajin, por kanë 5 ditë që nuk mbyllin sytë. Këta nuk shkojnë as me makina ku të heqin xhupin sapo të futen brenda, sepse ndezin kondicionerin, jo, këta duan një xhup shtesë sepse do jenë jashtë derisa të zbardhi dita tjetër, pa humbur sekondin me shpresën se aty nën gurë do jetë dikush që akoma merr frymë. Sot në ditën e çlirimit, këta që prej lodhjes mezi qëndrojnë në këmbë, me forcë. Kur të mbarojë kjo, ju duhet të qëndroni në këmbë dhe ne duhet të ulemi para jush. Respekt për gjithë ekipet e shpëtimit. Zoti ju ruajt”, ka shkruar Besi në një postim në ‘Instagram’.
https://www.instagram.com/p/B5dQIfuH01m/?igshid=gslcxw91otrj
