Beyonce solli frymën e Andrey Hepburn në “Breakfast at Tiffany’s”, kur u shfaq në fushatën reklamuese të ‘Tiffany & Co’: About Love Campaign. Bashkë me Jay Z, fotot e para të ikonës së muzikës, janë pëlqyer shumë nga fansat dhe po bëjnë xhiron e rrjetit.
Ajo ka vendosur në foto diamantin shumë të famshëm të Tiffany plot 128.53 karat, duke u bërë kështu, gruaja e 5 në botë që e vendos dhe e para me ngjyrë.
E veshur me një fustan të zi, shumë klas, ajo u shfaq duke përqafuar bashkëshortin e saj. “Dashuria është diamanti që një bizhuteri dhe arti dekoron”, thanë dy të dashuruarit për ‘People’ lidhur me këtë fushatë.
Diamanti i verdhë që mban në qafë Beyonce, është zbuluar në Afrikë më 1877-ën dhe që prej asaj kohe është vënë vetëm nga 4 gra të tjera: Mary Whitehouse, Audrey Hepburn, Lady Gaga dhe Gal Gadot. Vlera e tij është 30 milionë dollarë./revistawho.com
