Këto ditë moti i përkeqësuar ka sjellë probleme të shumta në një pjesë të madhe të qytetve të Shqipërisë. Përveç rrugëve të përmbytura duket se problemi është më i thellë, madje aty ku askujt nuk mund t’ja presë mendja. Një pjesë e personazheve të njohur kanë shtruar një problem shumë madhor që ka prekur ditën e fundit ‘Bibliotekën Kombëtare’. Në rrjete sociale kanë filluar të qarkullojnë disa fotografi në të cilat shihet se punonjësit e bibliotekës kanë hapur në të gjithë korridoret librat e lagur nga shiu për t’u tharë.
Kjo çështje ka ndikuar një pjesë të madhe të opinionit publik, kryesisht frekuentues të bibliotekës dhe jo vetëm. I pari ka qenë Drini Zeqo ai që shtroi këtë problem në ‘Instagram’-in e tij. Ai ka publikuar fotografitë nga ‘Biblioteka Kombëtare’ dhe ka shkruar: “Vitet e fundit nuk kam shkuar në bibliotekë sepse librat që më janë dashur i kam gjetur nëpër librari. Por në gjimnaz dhe herë pas here, edhe për qëllime pune, e kam frekuentuar ‘Bibliotekën Kombëtare’. E di që mbase shumë prej jush nuk kanë hyrë asnjëherë e as i intereson, ose e thënë ndryshe ky vend mund të ketë probleme shumë më të mprehta. Por këtë e shoh si një problem vërtet shumë te madh. E kemi zënë gjithë vëmendjen duke u marrë me kullat e godinën e Teatrit por po harrojmë që jo shumë larg një tjetër instituticion i than librat e lagur në kushte të mjerueshme”.
Më pas ka reaguar edhe Olti Curri dhe këngëtarja Orgesa Zaimi. “Vjet 40 mijë libra u dogjën, këto ditë me mijëra të tjerë u përmbytën në Bibliotekën Kombëtar, por askush nuk mendon për këtë thesar, sepse kultura dihet që është pasuri e vyer që e kuptojnë pak njerëz… por nuk paska më keq kur fati i librave varet nga të paditurit inatçinj ndaj dijes”, – ka shkruar Olti. Ndërsa Orgesa e ka cilësuar si “tragjedinë e vitit 2018-të”. /revistawho.com
